由於咖啡的酸比好多人誤會，所以我要企出嚟幫佢講句公道説話🧐
😎唔少人自小係餐廳飲咖啡，無論咩價錢、級數嘅咖啡，定必略帶苦澀。 小朋友嘅味蕾最坦率，對咖啡大多抗拒。 但人類對咖啡苦味嘅容忍，好大程度係源自對咖啡因提神作用嘅追求。 真正嘅好咖啡，唔應該係愈苦愈好，反而要追求甜、酸與苦嘅平衡。
🤪可能醋嘅形象太深入民心。 每當有人提到精品咖啡會帶酸，好多人就自自然然立即選擇其他飲品。 係英文入面，酸可以譯作「acidity」，即果酸，係芬芳、醒神的；而相對負面嘅用詞係「sour」，用以形容醋、過期牛奶與變壞生果嘅酸味。
優質咖啡豆內含大量有機原料，烘焙師嘅工作，就係以唔同火力同時間將原料分拆、組合、裝嵌。 係咁樣嘅連鎖反應下，可製造出多達800種人類感官能偵測嘅物質，相比下一向被譽為複雜嘅紅酒🍷，只有200餘種而已🤨
正面同負面嘅酸，可能只係一線之差。杯測咖啡時，酸嘅質素（quality）比強弱（intensity）更重要；一杯淡淡嘅檸檬水，一定比濃縮醋較易令人接受！ 埃塞俄比亞Harra產區嘅咖啡，以莓類味道而著名，而同國嘅耶加雪菲（yirgacheffe）則以花香、柑桔酸為主。 若將咖啡豆送去化學分析，會揾到檸檬酸（citric acid）、蘋果酸（malic acid）以及葡萄內嘅酒石酸（tartaric acid）。 所以果香係毋須添加，更唔係憑空幻想出來。
最後係各大超市買到嘅即溶咖啡，生產商好多時為左掩蓋廉價豆嘅瑕疵，索性將咖啡豆烘焙至極點，將豆豆揸乾揸淨，豆豆內一切嘅有機物燒成炭（charcoal），然後廠商更幫呢啲豆豆貼上「炭燒咖啡」呢個美侖美奂嘅名稱及包裝紙，但實際上稱之為「炭化咖啡」也不為過。